प्रमुख प्रतिपक्षी दल नेपाली कांग्रेसका सभापति गगनकुमार थापाले प्रधानमन्त्री बालेन्द्र शाह (बालेन) ले आफ्नो निकट व्यक्तिलाई सर्वोच्च अदालतको प्रधानन्यायाधीश बनाउन विभिन्न जालझेल गरिरहेको आरोप लगाएका छन् ।
बुधबार पार्टी संसदीय दलको बैठकपछि सञ्चारकर्मीहरूसँग संक्षिप्त प्रतिक्रिया दिँदै थापाले प्रधानमन्त्री शाहले संवैधानिक परिषद्सम्बन्धी अध्यादेश ल्याएर आफूअनुकूल नियुक्ति प्रक्रिया अघि बढाउन खोजेको दाबी गरे ।
उनले संसद्को अधिवेशन आह्वान गर्ने र बन्द गर्ने कार्यलाई पनि सोही उद्देश्यसँग जोडिएको ‘प्रपञ्च’ को रूपमा व्याख्या गरे । थापाका अनुसार संवैधानिक परिषद्माथि नियन्त्रण कायम गर्न अध्यादेशमार्फत कानुनी संशोधन गरिएको हो, जुन लोकतान्त्रिक मूल्य–मान्यताविपरीत भएको उनको भनाइ छ ।
प्रधानमन्त्रीले आफ्नो इच्छाअनुसार प्रधानन्यायाधीश नियुक्त गर्ने प्रयास स्वीकार्य नहुने स्पष्ट पार्दै उनले नेपाली कांग्रेसले यस विषयमा कडा असहमति जनाउने बताए ।
यस्तो छ गगन थापाको भनाइ :
“भोलि संवैधानिक परिषद्को बैठक बोलाइएको छ ५ बजे । प्रधानन्यायाधीश कसलाई बनाउने भन्नेबारेमा राष्ट्रिय स्वतन्त्र पार्टीले एउटा सोच बनाएको छ । त्यो प्रधानन्यायाधीश बनाउने पात्र प्रस्तुत गर्छु, त्यसका लागि तर्क प्रस्तुत गर्छ । यसको आधारमा संवैधानिक परिषद्बाट यसको निर्णय गराउँछु भनेर होइन । मैले प्रस्तुत गरेको प्रस्ताव म पारित गराउँछु भनेर कस्तो जालझेल गरिएको छ भने प्रधानमन्त्री हुनुहुन्छ, सभामुख हुनुहुन्छ । र भोलि कानुनमन्त्री आउनुहुन्छ । उहाँ आइसकेपछि तीनजनाले पारित गरेको कुरा बहुमत हुन्छ भनेर यो प्रधानन्यायाधीश कसलाई बनाउने ? आफूले खल्तीबाट झिकेको नामलाई प्रधानन्यायाधीश बनाउने । जसलाई मन लाग्यो, त्यसलाई बनाउने । त्यहाँभित्र अमङ द उमेदवार । यो कुरा सोचेर यसरी त्यो संवैधानिक परिषद्लाई आफ्नो नियन्त्रण राख्नका लागि यस्तो ठूलो संसद आह्वान गर्ने, संसद बन्द गर्ने सबै प्रपञ्च रचिएको छ । अगाडिको प्रधानमन्त्रीले ठ्याक्कै यही गर्नुभयो । त्यो बेला हामीले रोक्यौँ । अब अहिले हामीले रोक्न सकेनौँ । किनकी यो अध्यादेश बनेर गयो । तर, अगाडिको प्रधानमन्त्रीले आफ्नो मान्छे ल्याउनका लागि गरिएको त्यो भन्दा के फरक भयो र यो ? यो भन्दा अगाडिको प्रधानमन्त्रीले आफ्नो मान्छे नियुक्तिका लागि पूरै जालझेल गर्नुभयो । अहिलेको प्रधानमन्त्रीले पनि त्यही जालझेल गर्दै हुनहुन्छ । यो आपत्तिजनक छ । यसमा नेपाली कांग्रेस पार्टीको प्रश्न छ । यसमा हाम्रो असहमति छ । यो कुरा हामीले यहाँ राखेका छौँ । यो कुरा हाम्रा साथीहरूले संसदमा राख्नु हुन्छ ।”
