रुकुमपश्चिमको एक सामुदायिक विद्यालयमा ताला लगाइएको छ । सानीभेरी गाउँपालिका–७ फुक्रुमा रहेको जनज्योति आधारभूत विद्यालय ताला लगाइएको हो ।
विद्यालय भवन निर्माण गर्दा लिएको निर्माण सामग्रीको भुक्तानी नपाएपछि व्यावसायीले ताला लगाएका हुन् । सानीभेरी हार्डवेयरका सञ्चालक मनीषा बिसी ओलीले २०७५ सालमा विद्यालय भवन निर्माणका लागि लिएको सामग्रीको भुक्तानी नपाएकाले तालाबन्दी गर्न बाध्य भएको बताएका छन् ।
विद्यालयमा तालाबन्दी हुँदा पठनपाठन प्रभावित भएको छ ।
विद्यालयको भवन निर्माणमा केही रकम पहिले दिए पनि करिब नौ लाख रकम बाँकी रहेको र हालसम्म ब्याज जोडेर १४ लाख ९० हजार रुपियाँ पुगेको उनको भनाई छ।
विद्यालयको गेटमा ताला लागेपपछि अहिले शिक्षक र विद्यार्थीहरु गेटबाहिर रहेको प्रधानाध्यापक भीमबहादुर ओलीले बताए । कक्षा ५ सम्म सञ्चालन भएको उक्त विद्यालयमा ५० जना विद्यार्थीले पठनपाठन गर्दै आएका छन् ।
प्रधानाध्यापक ओलीका अनुसार सानीभेरी हार्डवेयरबाट जम्मा नौ लाख ९७ हजारको निर्माण सामग्री खरिद गरेको र चार लाख रुपियाँ तिरिएको छ । हाल ब्याज जोडेर धेरै रकम भएको उनको भनाइ छ । प्रधानाध्यापक ओलीले विद्यालय भवन निर्माणको जिम्मा लगेको खड्का एण्ड केसी निर्माण सेवालाई पनि करिब छ लाख रुपिया तिर्न बाँकी रहेको र पटक–पटक उक्त निर्माण व्यवसायीले पनि विद्यालय बन्द गर्ने चेतावनी दिइरहेको बताए । भवन निर्माणका लागि आएको बजेट जग्गा खरिदमा खर्च भएपछि पूरा रकम भुक्तानी हुन नसकेको बताइएको छ ।
