नेपाली कांग्रेसका सभापति गगन थापाले अबको पाँच वर्ष पार्टीले मधेसका मुद्दा बोक्ने बताउनु भएको छ । शुक्रबार धनुषामा भएको कार्यकर्ता भेटघाटमा सभापति थापाले मधेसले सम्पूर्ण विश्वास दिए कांग्रेसको एकमना सरकार बन्ने र सम्पूर्ण मुद्दा पनि बोक्ने बताउनु भयो ।
“मधेसले पूर्ण विश्वास दिएपछि कांग्रेसको एकमना सरकार बन्छ । त्यो सरकारले मधेसका मुद्दा जुरुक्क बोक्छ । चाहे त्यो संविधानसम्बन्धी विषय होस्, चाहे मधेसीमाथि हुने अन्यायपूर्ण विभेदसँग जोडिएको विषय हुन् सबै मुद्दा कांग्रेसले बोक्छ,” सभापति थापाले भन्नुभयो , “म निर्वाचन क्षेत्र नभएर यहाँ आएको होइन, मधेसलाई जोड्न आएको हुँ, नेपाली कांग्रेसको जननी हो ।”
उहाँले मधेसका मुद्दा सम्बोधन गर्न आफूले मात्र जितेर नपुग्ने बताउनु भयो । पार्टीबाट भएका कतिपय त्रुटिले धेरैजना कांग्रेसबाट बाहिर बसिसकेको स्वीकार गर्दै अहिले फर्कने क्रम सुरु भएको बताउनु भयो । “हिजो पार्टीबाट कतिपय कमीकमजोरी भएका छन् । जसका कारण धेरै साथीहरू पार्टीभन्दा बाहिर जानुभएको छ । हिजोदेखि हामीसँग जोडिनेक्रम सुरु भएको छ,” थापाले भन्नुभयो , “अब सबै साथीहरू एकजुट हुनुस् । एक भएर बाहिर गएकाहरूलाई घर फर्काउने पहल लिनुस् ।”
उहाँले निवर्तमान सभापति शेरबहादुर देउवासँग संवाद भइरहेको भन्दै पार्टीभित्र विभाजित मत अहिले बाँकी नरहेको बताउनु भयो । धनुषा–१ का उमेदवारसँगै, क्षेत्र नम्बर–३ का उमेदवार पूर्वउपसभापति विमलेन्द्र निधि, क्षेत्र नम्बर–४ का उमेदवार महेन्द्र यादवलाई पनि जिताउन आग्रह गर्नु भयो । “मलाई मायाँ गर्ने साथीहरूले धनुुषा–४ का उमेदवार महेन्द्र यादवलाई पनि माया गर्नुपर्छ, चुनाव जिताउनुपर्छ । अनि मात्र मलाई वास्तविक रूपमा माया गरेको ठहर्छ,” थापाले भन्नुभयो ।
उहाँले देशलाई सम्हाल्ने र अवस्था सुधार्ने दुईवटा काम एक साथ गर्ने बताउनु भयो । कार्यक्रममा जसपाबाट चुनाव जितेका स्थानीय जनप्रतिनिधिसहित कांग्रेस प्रवेश गर्नु भएको थियो ।
