देशमा बढ्दो महँगीले सर्वसाधारणको दैनिक जीवन झन् कष्टकर बन्दै जाँदा त्यसप्रति असन्तुष्टि चुलिँदै गएको छ। यही सन्दर्भमा नेपाल तरुण दलका केन्द्रीय सदस्य तथा युवा नेता सुरेश डंगोलले महँगी नियन्त्रणमा सरकार गम्भीर नदेखिएको भन्दै कडा आपत्ति जनाएका छन्। डंगोलले सरकारको निष्क्रियताका कारण बजार अनियन्त्रित बन्दै गएको आरोप लगाउँदै तत्काल प्रभावकारी कदम चाल्न माग गरेका छन्। “जनताको आधारभूत आवश्यकतामा समेत महँगीले मार परेको छ, यस्तो अवस्थामा सरकार मौन बस्न मिल्दैन,” उनले भने। उनले चेतावनी दिँदै भने, यदि सरकार जनताको समस्या समाधानतर्फ गम्भीर नबने शान्तिपूर्ण तर सशक्त आन्दोलनको विकल्प नरहनेछ। उनका अनुसार, महँगीविरुद्ध दबाब सिर्जना गर्न आवश्यक परे सडक संघर्ष समेत अघि बढाइनेछ। यसैबीच, नेपाल तरुण दलले महँगीविरुद्ध देशव्यापी कार्यक्रम ल्याउने तयारी गरेको जनाएको छ। संगठनले युवाहरूलाई एकजुट भई जनसरोकारका मुद्दामा सक्रिय हुन आह्वान गरेको छ। व्यावसायिक पृष्ठभूमि भएका डंगोल लामो समयदेखि युवामाझ सामाजिक सेवामा सक्रिय रहँदै आएका छन्। उनले विभिन्न सामाजिक तथा सहयोगात्मक अभियानमार्फत युवाहरूलाई संगठित गर्दै जनहितका काममा जोड दिँदै आएका छन्।